Amaruba ga Nnakâa Mugangu

1. Bene wirhu bazigirwa . . .

Indi ondamukize?

Wendi Waliha?

Nie Mugangu¡

Wene ocihikire¡

Asinge, asinge, ka buholo? Neci buholo. Omurhula gwa Yezu Christu gube naninyu mweshi.

2. Ebiyerekire Okuyololoka n’oLuhoze haguma na FONDAMU

Ndi baganiza okubiyerekire amajambere:  kurhi omuntu anka yololoka n’oluhoze.

Banji mulirhwe bayumvirhe oku FONDAMU alonz’amajambere eno mwirhu emwa Ngweshe. Cigabi ciguma ca derha oku oLuhoze lwanalerh’okuyololoka omu mulala. Cibanji barha hugukaga bwinja, gurhi ok’o kwankaba.

Hali bigabi birhanu ly’obololoke buyisha n’oLuhoze, omu mulala n’okulugo.

3. Ecigabi cirhanzi:

Abantu bomurhima mwinja banaja haguma omucigamba c’okurhabalana. babe nka bani erhi barhanu, baderh’erhi rhwalonza okuyololoka. Banaciganize bone nabone, bagerereze. Bici rhwankajira rwheshi haguma l’yo rhurhenga omubuja, bw’okubula ensabuni, erhi kubul’okusomesa abana, erhi okugula ecirondo, erhikandi okuheka omwana okubufumu, erhi omuntu yene. Baguma banaderha rhushweke ebirugu, nka mpene, erhi nsungura, erhi ngoko…Abandi erhi nanga la, rhuhinge baShuu, erhi karaoti, rhukabiguza eBukafu…N’abandi baderhe, kerhi omuntu arharhimbula ebi analonzize, nka mishangi, erhi biryo bya ngasi lusiku nka nshano erhi mavurha. Aho rhuyunvirhe oku eco cigamba, cikola cigererezize, bulya cigwerehe obukengere, n’obulonza b’okurhenga omu buja haguma. Buja bwa kubulirwa, n’ensaranga erhi ebintu by’obulagirire.

4. Ecigabi ca kabirhi:

Abantu b’eco cigamba bana cidose, lero indi wankarhuhoza ensaranga rhwa rhondera mwo? Erhi rhwayunvirhe okuFONDAMU adesire oku anarhabala n’ensaranga nsungunu z’okurhondera mw’o amajambere g’oLuhoze. Aho cirhya cigamba cana bona entumwa ya FONDAMU. 

5. Ecigabi ca kasharhu:

FONDAMU naye ana badosa, mulibanga omucigamba cinyu ? Kamwa gererezize okwebi mwalonz’okujira haguma ? Neci, yaah, cimira rhwarhonderaga okushweka ensungura omucinyabuguma cirhu. Cirhurhasigi rhaluka nsungura makumi asharhu, bulya erhi omwana wamuguma alwala, erhi nkabuhya buli, erhi nk’omuntu alipira omwana amasomo, anaje mulya bushesi bw’ecinyabuguma, anahune nkazage nsungura ebirhi erhi isharhu, atwe molubanja. Nowundi ntyo. Kandi obushweke bwirhu, bulya buli lushangire, ngasi muntu alonze okuhagula, ebintu bina je by’a punguka. Obone kandi ensungura zamahwa, nataye wa yololoka. 

6. Ecigabi ca kani.

Olya mulenga wa FONDAMU anababwiriza gurhi mwanka jira l’yo bulya bushwesi bulerh’obololoke bwangasi muguma anamanye oku aj’embere, omulala gwage nago guj’embere, n’olugo lujembere. Co cirhumire FONDAMU adesire oku oluhoze lwana gera kuli ngasimuguma  nka likeremba. Ngasi muguma erhi agalula ebirugu ahabagwa, owakabirhi naye anahabwa ; n’owakasharhu naye erhi owakabirhi ayusa alya. Nantyo nantyo kuhika omuzinda mwa cirya cigamba naye alyûla, abantu banacibi rhonderera na zirya nsaranga ntangiriza, kuyushula haguma n’ezi omuntu akola agwerhe, zibe kasharhu erhi kani kulusha. Bulya erhi omuntu ayusha alyula, akwanine oku gendesa emikolo yagalya majambere g’oLuhoze. Nabuzind’ abantu bana rhondera okushwek’engulube, n’empene; na hagera ensiku obone omunkafu bakola bali. 

Nkagurhi obwo waliha?

Ka mumanyire oku FONDAMU akaha dollari makumi arhanu kuli ecigamba ca bantu bani erhi barhanu, balya banagwerhe obuzigire b’okurhabalana n’okutumika haguma zirha nkengero n’entanya zabo ziyerekire oLuhoze n’obololoke, erhi alonzize murhenge omubuja bw’obugalaganda. Ahola edollari makumi arhanu zahanwagwa na FONDAMU, oku myezi isharhu erhi ini zikwanine okugaluk’emwa FONDAMU, erhi n’olya murhanzi wa habwagwa zirhya dollari  akola agwerhe kabirhi kulusha halya ahabiragwa.  Kwokuderha, enyuma lya myezi ini, olya muntu warholaga oluhoze lurhanzi, ly’ayishirhenga obugalaganda, akwanine okuba akola agwerhe dollari igana n’ikumi omu birugu, bishwekwa, erhi nsaranga. Anagalula Dollari makumi arhanu nirhanu kuli FONDAMU, naye yene erhi anacigwerhe ebirugu bya gandi makumi arhanu nirhanu omubushwesi erhi omunsaranga. N’ahola lero ngasi yeshi a gwarha ezage nsaranga ajira nkoku abwine, akaba masomo gabana, akaba cilondo, akaba bufumu, ye bilabire, erha cirhi ababo, erhana ciriFONDAMU, bulya mira analulaga.

Lero ecinyabuguma n’aco gurhi cankaba obwo?

Ecinyamuguma cabâ, bulya olya odwirhe akolesa ensaranga, ababo banaka mugwasa, nanka arhagerhi kasanzi ababo banamurhabala okulola zirya nsungura, na buzinda naye erhi owabo akola adwirhe atumikisa zirya dollari, anrhbalwa na muguma mwa cirha cikundi.

N’okubundi, ngasi iposo erhi maposo abirhi, ecikundi cnarhimanana, cinaganire kurhi olya wabo odwirhe wakolesa galya maDollari adwirhe atumika, an bici bawine binja erhi bibi bya kukubûla. 

N’abalenga baFONDAMU banagera liguma omumwezi okurhangula gurhi begendesire, na akaba ali ebikubire anabikubule, kaguma n’ecigamba, n’olya wabo ogwerhe atumikisa oluhoze. Enyuma za myezi ini, olya muntu wa lyaga eDollari entanzi, anagalulira FONDAMU. naFONDAMU naye anahereza owakabirhi. Ekontra yanajirwa enabe nsigné (a) nawalya, (b) n’ababo omucigamba, (c) n’omuntu wa FONDAMU, oku simika oco cinyabuguma. Bulya olya warhangigirhya akayabirwa nababo erhibanayabirwe, barhakacirya emwa FONDAMU.

7. N’ecigabi ca karhanu . . .

FONDAMU analerha ensaranga z’oLuhoze, rhuderhe dollari makumi arhanu ($50). FONDAMU, n’owalya, n’ababo omucigamba cabo bana signé ekontra, y’okuderha oku hano hagera myezi ini, nsaranga kulusha kabirhi eza rhonderaga zanahaba ($55). Akapitali na 10% zanagalulwa emwa FONDAMU. N’omuntu yene asigalane ebirugu erhi nsaranga ziri nkakapitali n’owundi 10% (ko kuderha 55dollari)w’okuyerekana oku aja aj’embere. Akayabiwa okugalula zirha nsaranga zoshi, anahabwa mwezi muguma erhi ibirhi y’okulusha nka bubabalire ; n’ahola enyuma yezo myezi analipa $60, ko kuderha ozindi ($5) z’amalipizi. Nakandi awakabirhi omulugamba lwage alinda omurhanzi a galule akapitali na 20% l’yo naye alya. Kokuderha, ngasi wa legerera okulipa arhuma ababo balinda embere nabo balye. 

8. Okushwinja.

Oluhoze, lurhahunyiri nsaranga nyinji ,nyinji. Bulya zikarhaluka amakumi arhanu, hali banji balonza oku kula mwo birya balagirire mwo ; Buzinda erhi myezi ini zigera, aje omu ntambala bulya arhanka ciripa arahana yololoke. Oluhoze lulonzize eDisipline, n’okukulikira ebyo bigabi bini.

Kokagwe bene wirhu. Musigalage n’omurhula gwa Kristu. Mukarhabalana, ly’o rhuyololoka, n’ecihugi c’a Ngweshe naco ciyololoke. Niehe ngalusire eKinshasa. Akaba osimire aga maruba ga Nnakâa Mugangu, onyandikire oku email : trinto@fondamu.org Emyanzi yawe yanaja ahalira mwa gano MARUBA GA MUGANGU, l’yo rwheshi rhukahugulana. Rhwabonana omunsiku za yisha.